المخاطرة، عدو أم حليف؟ ♟️

بدايةً، ايش هي المخاطرة ؟ ووش فرقها عن المخاطرة الذكية ؟

من الطبيعي جدًا ان كل إنسان قبل يقدم على أي خطوة، بتخطر في باله تساؤلات بغيضة قد تبث الخوف والقلق في نفسه وتحول بينه وبين فرص عظيمة جدًا، وهذا بسبب أن مفهوم المخاطرة بحد ذاته دايمًا يركز على النواحي السلبية المترتبة على قرارٍ ما، لكن لما تنظر للمخاطرة كفرصة ممكن تعود عليك بنتائج إيجابية، بيتحول هذا الهاجس من مصدر قلق وتوتر إلى فرصة تستحق أنك تغتنمها

متى تكون المخاطرة هي القرار الصحيح ؟

بكل بساطة، لما تدرس جدوى خطتك وتربطها بأهدافك طويلة المدى. معرفة هالنقطتين أساسي وجوهري جدًا قبل اتخاذك لأي قرار. لأنك وقت تكون مُلم وواعي فيها بتقدر تفرّق بين المخاطرة اللي بتوديك لقدّام، والمخاطرة اللي بتأخرك لخطوات

قبل نبدأ نشرتنا، قد سمعت بـ جائزة المستثمر الذكي الخليجي ؟

الجائزة هي أحد مبادرات برنامج مُلم، وتهدف إلى تشجيع الشباب في إنتاج محتوى إبداعي يُسهم في إثراء المحتوى المالي والاستثماري. المسابقة تتكون من أربع مسارات وهي التصوير، الفيديو، الرسم والكتابة، وتصل قيمة الجوائز عليها إلي ما يزيد عن 1,500,00 ريال سعودي! شيّك على التفاصيل ولا تفوت على نفسك الفرصة

طيب ليش نحتاج المخاطرة في حياتنا؟

ممكن واحد يقول "طيب ليه ما أبعد عن الشر وأغني له؟ ليه ادخّل نفسي بهالدوامة وأنا مرتاح بدونها؟"

والإجابة بكل بساطة هي: الشخص اللي ما يطلع من منطقة راحته ولا يقتنص الفرص ولا يجرب أو يغامر؛ صعب جدًا بل يمكن مستحيل أنه يحقق نجاحات كبيرة وباهرة. ولو تشوف قصص الناجحين كلها، بتلاحظ إن العامل المشترك بينهم كان إنهم اتخذوا قرارات صعبة ومصيرية في مرحلةٍ ما وكانت هي السبب في أنهم يوصلون للي وصلوا له اليوم. يعني صح تقدر "تبعد عن الشر وتغنيله" لكنك في الحقيقة قاعد تضيع على نفسك فرص ذهبية وممكن تغير في مستقبلك بالكامل

مثال يحتذى به لنتائج المخاطرة

اقرب مثال على مقتنص الفرص هو سليمان الراجحي مؤسس بنك الراجحي أحد أكبر البنوك في السعودية والعالم العربي! بدأ برأس مال يقارب 400 ريال - اللي تعادل تقريبًا 10 آلاف بزمننا الحالي- ومباشرة بدأ أول نشاط له في مجال المصرفية. سليمان وقتها اتخذ قرار خطير في إنه يبدأ مشروع ضخم برأس مال قليل، لكن لأنه درسها صح وفكر بكل الاحتمالات قدر يوصل للنتيجة اللي يمكن حتى هو ما كان يتوقعها

فكثير من الناس يخافون من كلمة مخاطرة وينظرون لها كـ تهديد مباشر، لكنها في الحقيقة ممكن تكون أقصر طريق تحقق فيه أهدافك سواءً كانت المالية أو غيرها