اودع مبلغ عالي مرة واحدة، أو قليل مستمر؟
يقولون العرب قديمًا "قليلٌ مستمر خيرٌ من كثيرٌ منقطع" وفي هذي المقولة نقدر نستنبط قاعدة استثمارية ينصح فيها معظم الخبراء الماليين.
المعروف والمنطقي أنك تجمّع مدخرات بسيطة من كل شهر إلى ما يكون عندك مبلغ طيب تقدر تستثمر فيه مثلًا ويرجع لك بعوائد متوقعة ممتازة، أو أنك تشتري في هالمبلغ الطيب شيء معيّن مخطط عليه. لأن عندنا تصوّر مرسّخ أن الواحد إذا بيستثمر لازم يحط مبالغ ضخمة، ومن غير المنطقي أن مبالغ بسيطة ممكن تسوي أي شيء استثماري جيد.
طيب وش الفرق بين الاستثمار بمبلغ ثابت شهريًا والاستثمار بمبلغ كبير مرة وحدة؟
خلونا ننظر للمقارنة من جانبين:
جانب عاطفي/نفسي (سلوك المستثمر) و جانب مالي (أداء السوق)
الجانب العاطفي/النفسي:
الاستثمار بمبلغ ثابت شهريًا راح يساعدك على تكوين سلوك مستدام بالاستثمار والاهتمام لعزل مبلغ من دخلك الشهري للمستقبل، وبالإضافة إلى ذلك راح يساعدك تتجنب تأثير تقلبات السوق والأخبار اللي تسمعها في المجالس
لو ترجع معي بالزمن لعام 2007م وتتخيل أنك مستثمر كبير في السوق الأمريكي تحديدًا في S&P500، راح تلاحظ أن المؤشر حقق عام 2007م 3.53%، بعدها بسنة وفي عام 2008م حقق -38.49%، الواضح من أداء عام 2008م أن أغلب المستثمرين كانوا متوقعين ان الاستمرار في الاستثمار راح يتسبب في خسارتهم وعلشان كذا قرروا أنهم يبيعون ويؤكدون الخسائر. طيب واللي صمل وش صار عليه؟
أبشرك أنه ارتفع أداء المؤشر من عام 2008م إلى عام 2023م بمقدار 377.20% على مدار الـ15 سنة، يعني 10 تقريباً سنويًا
فاللي مستثمر بوتيرة أقل واستمرار أعلى كان أقدر على أنه يكمل ويصمل في استثماراته حتى مع نزول السوق وانهياره بعكس اللي جمّع مبلغ كبير ثم استثمره دفعة وحدة دون توزيع.
أما الجانب المالي:
ايييه وش أقولك عن الجانب المالي .. هنا الزبده على قولهم.
فيه طريقتين، هي أنك يابن الأصول تختار الأصول الاستثمارية بنفسك، أو تحطها مع مدير استثمار محترف (يعني مثل دراهم) المهم، اذا اخترت الأصول بنفسك راح تتعب في تحديد الأصول وكل فترة لازم تدخل على المحفظة وتتأكد أن أوزانها صحيحة وأن العوائد نزلت كاملة وتعيد استثمار العوائد بنفس النسب اللي حطيتها أول ويمكن تسمع أخبار عن سهم مصقع الدنيا وتحطه في محفظتك بس لأنك سمعت كم خبر حلو عنه، وليله طويلة مالها أول ولا آخر.
طيب والمستثمر المحترف وش الزين فيه؟
وش الزين فيه! ، بأقولك ..
أضف المبلغ الاستثماري، وريح بالك. لالا خلني بعطيك تفاصيل أكثر.
بعد ماتضيف المبلغ راح يتأكد أن توزيع المحفظة صحيح وإذا جت عوائد استثمارية راح يعيد استثمارها بدون ما تدخل وتتعب نفسك، وزود على كذا يوفر لك طريقة تقدر تخلي الإيداع الشهري تلقائي (في دراهم مسمينها الصملة) بدون ماتشيل هم أنك شهريًا لازم تدخل على تطبيق البنك وتحوّل بشكل يدوي. وبخصوص إعادة الموازنة فتكون تلقائية بدون تدخل (بشري/ نفسي/ عاطفي) بل بأرقام وتحليلات مالية يوزّن لك بين الأصول ويرتبها لك.
ختامًا،
نتائج الاستثمار القليل المستمر مفيدة وفعّالة على الصعيدين النفسي والمالي، وتكوين عادة الاستثمار والاستقطاع الشهري هي من أبرز الأشياء اللي بتستفيد منها على المدى البعيد، على صعيدك الشخصي والمالي وبرضوا الاجتماعي.
