ارتفاع تاريخي للسوق السعودي 🇸🇦📈
صبحك الله بالخير👋🏼،
يقول الشاعر:
لا تلتفت لباقي الأسواق وأنت مع تاسي
ما اتوقع فيه أحد كان يتوقعها بهالشكل، لكن السوق السعودي سجّل ارتفاع تاريخي خلال الأيام الماضية، والمؤشر العام وصل لأعلى وتيرة ارتفاع منذ مارس 2020.
لكن خلنا نتساءل شوي .. كم شخص استسلم؟ قبل شهرين كم مستثمر باع خوفًا من زيادة الهبوط؟ كم مستثمر أثرت فيه الأقاويل والتنبؤات؟
لكن زي ما نقول دايمًا، هذا هو السوق وهذي طباعه.
يرتفع فجأة، وينزل فجأة، واللي فعلًا دايمًا نقوله أن المغزى هو المدى البعيد. وإن نزلات السوق اللي ترعبك في فترات هي مجرد نقاط طفيفة في رحلتك الطويلة.
طيب، تخيل إنك استسلمت،
وش بتكون ردة فعلك؟
وهل فعلًا تقدر تعرف متى "الوقت الصح"؟ الأرقام تقول حسب نشرتنا السابقة بعنوان "أهم نشرة تقرأها هالسنة":
78٪ من أفضل أيام السوق تاريخيًا…
تصير وسط النزول، أو مباشرة بعده.
لو فاتتك فقط أفضل 10 أيام في السوق خلال 30 سنة…
تقل عوائدك للنصف.
ولو فاتتك أفضل 30 يوم؟ تخسر 83٪ من العوائد المتوقعة!
وش تقدر تسوي؟
أنك تصمل، البقاء للأصمل. لا تحاول تتنبأ، ولا تحرّكك العواطف. خلك مستثمر صامل .. وخل الوقت يشتغل لك.
نقول هالشيء في نزول السوق قبل صعوده. حتى لو السوق ارتفع فجأة لمستويات غير مسبوقة، وبدأ المحللين ينصحون ويوصون، فلا تغيّر خطتك وصملتك. كمّل على إيداعاتك في المنشط والمكره، وعلى المدى البعيد .. الربح للأصمل.
