تملك دراهمك، ولا دراهمك تملكك؟

وش يعني يكون عندك وعي مالي؟

كثير نسمع مصطلح "وعي مالي"،
ويتصوّره البعض إنه شيء نخبوي، خاص بالخبراء. لكن الواقع مختلف تمامًا. الوعي المالي ما له علاقة بحجم محفظتك أو راتبك.
هو ببساطة: طريقة تعاملك مع الدراهم، وتفكيرك فيها.

دايمًا نقرأ عن أشخاص من أصحاب الثروات الكبيرة -الله يبارك لهم- يقولون لو اخسر كل ثروتي اليوم لأي سبب كان، تعال بعد سنة وتحصلني رجعت ثروتي!

طبعًا جزء من إعادة ثروتهم يرجع للعلاقات والتجارب المتراكمة اللي كانت عندهم، لكن كذلك واحدة من الأسباب، هي في "وعيه المالي".

كذلك ليش نشوف اثنين بنفس الراتب، وواحد مرتاح ويلبي مستويات الرفاهية له ولعايلته، والثاني متورط ومتقروش ومو قادر يمكن على بعض الأساسيات؟ نفس الشيء "وعيهم المالي".

الوعي المالي يبدأ من سلوك بسيط

الشخص الواعي ماليًا يمكن يكون طالب جامعي أو موظف جديد، لكن يعرف كم يدخل عليه، وكم يطلع منه، يعرف متى يقدر يقول "لا" لرغبة، ويعرف كيف يخطط لشراء، ومو شرط يكون مبالغ في التحفظ والحرص .. لكنه متّزن.

في دراسة أجراها Bankrate في 2023،
تبين إن 56٪ من الأمريكيين ما يقدرون يغطون طارئ بـ1000 دولار من مدخراتهم.
وهذا مو لأن الكل دخله ضعيف، بل لأن كثير يعيش بدون رؤية مالية واضحة.

نفس الشي ممكن نشوفه في مجتمعنا.

الوعي المالي لا يساوي "التشدد"

كثير يربط الوعي المالي بالتشدد، أو الـ"حرمان"، بس في الحقيقة، الوعي يعطيك حرية أكثر، لأنك تعرف وش تقدر عليه، وتعيش مرتاح إنك ماشي على خطة، حتى لو بسيطة.

الوعي يخليك تشتري وأنت مقتنع، وتسافر بدون ما ترجع مديون، وتتخذ قرارات استثمارية متزنة بدل ما تمشي وراء "الهبّات" اللي بتورّطك.

علامات على إن عندك وعي مالي

• تعرف مصاريفك الشهرية (مو حفظًا، بل تتبعًا).
• ما تدخل في التزامات إلا إذا حسبت كل جوانبها.
• عندك هدف مالي واضح، ولو كان بسيط.

وكل هالأشياء دراهم بيقدر يساعدك فيها، تعرف مصاريفك وتقارير خاصة بسلوكك بشكل أسبوعي وشهري وسنوي، وتضبط ميزانياتك بحيث تعرف أمورك بشكل دقيق، ويساعدك تبدأ رحلة استثمارية مبنية على أهدافك.

وختامًا،

الوعي المالي ما هو رفاهية، ولا شي تحتفظ فيه للمستقبل. هو مهارة لازم تعيشها الآن ..علشان تبني حياة مالية أهدأ، أذكى، وأقرب لأهدافك.

ومثل ما قال الأعرابي: "المال خادم ممتاز… لكنه سيد سيئ."
الوعي المالي بيخليك تملك دراهمك .. ومن دونه دراهمك بتملكك.