تخرّج من الثانوية بمحفظة مليونية
*هذي النشرة غير مخصصة لأغنياء اليوم، بل لأغنياء المستقبل
تخيل معي أنك يوم تخرّجت من الثانوية العامة كان معك محفظة قيمتها مليون ريال! كيف كانت بتكون خياراتك؟ ولو أقولك أنك تقدر اليوم تخلي هالخيال واقع أولادك أو أخوانك الصغار، مع شهادة الثانوية .. محفظة متنوعة مليونية.
طيب قبل لا نشوف الطرق الأكثر واقعية والغير متكلفة ودي نعرف ليش أصلًا يعتبر هذا الهدف مهم، وهل العكس هو الأفضل في أن الشخص يبدأ من الصفر وتدقه الدنيا علشان يعرف قيمة الريال، أو أنها بتعطيك كأب وبتعطي الولد خيارات أكثر وتطبيق وأثر فعلي للاستثمار وإدارة الأموال؟
سيارة الابن أو رسوم جامعته لو كانت خاصة أو تكاليف زواجه لو تفضلّون الزواج المبكر، أو أقلها أن الابن يعرف أن عنده محفظة فيها أصول مليونية فتكون دافع له يتعلم أكثر ويشتغل على الاستثمارات وتنميتها، كل هذي وأكثر تبدأ بقرار بسيط تبدأه اليوم. كيف؟ خلني بقولك.
لو قريت نشرتنا بعنوان "سحر العائد المركّب" بتعرف أن استقطاعك لألف ريال فقط وبشكل شهري، قادرة لأنها توصّل أصول محفظتك لمليون ريال خلال 17 سنة وهو عمر ولدك عند التخرّج من الثانوي.
وزي ماهو موضح في الرسم البياني فوق أن المبلغ المستثمر حجمه 200 ألف تقريبًا وهي الألف ريال اللي أنت تستقطعها شهريًا، لكن مع سحر العائد المركّب قدرت تتضاعف لخمس مرات تقريبًا.
فإذا ودك ولدك ولا أخوك الصغير يتخرّج من الثانوية بمحفظة مليونية، كل اللي عليك تبدأ اليوم بمحفظة من عندك تخليها له ولمستقبله، وهالفكرة تثبت لك أن دراهم هو أريح وأربح طريقة للاستثمار!
