كيف تنجو خطتك المالية لسنة 2025

مع آخر نشرة في سنة 2024، نقدر نقول إن هالسنة كانت ممتازة الحمدلله لمعظمنا.

ومع نهاية كل سنة نبدأ تلقائيًا في عادة تخطيط السنة الجاية، محاولةً منّا لتجنّب نفس الأخطاء والسلوكيات المتكررة في كل سنة. ففي نشرة هاليوم بنناقش كيف تضبط خطتك المالية للسنة الجاية بأكثر الطرق واقعية.

مبدئيًا علشان تخلي خططك للسنة الجاية واقعية وقابلة للتطبيق. لا تحط أهداف كبيرة أو مثالية زيادة عن اللزوم، حاول تبدأ بأشياء بسيطة وواضحة وتكون فعلاً تناسب وضعك الحالي.

فكر وش اللي ودك تطوره أو تحققه، وبدل ما تشوف الصورة الكبيرة اللي تخوف، قسمها لخطوات صغيرة تقدر تمشي عليها وحدة وحدة. خل خططك مرنة، يعني إذا صار أي تغيير ما توقف، بحيث تعدل عليها علشان تقدر تكمل.

بعد كذا، لازم تكون جاد مع نفسك في الالتزام. يعني لا تخلي الحماس في البداية يطير وبعدين تفقد الاهتمام. وزّع مجهودك على طول السنة، وخلي كل شهر له هدف صغير عشان تحس بالتقدم، حتى لو كان بسيط.

ولا تنسى تراجع خططك كل فترة وتشوف وين وصلت. إذا حسيت إنك متأخر، عادي، عدّل الخطة واستمر. أهم شي لا تضغط على نفسك أكثر من اللازم، لأن الهدف إنك تتحسن، مو إنك تكون مثالي.

طيب، وش أهم النقاط اللي مفروض أركز عليها في خططي المالية للسنة الجديدة؟

فيه نقطة كثير نسمع عنها كنصيحة مالية مستهلكة، لكن فعليًا هي حجر أساس تبني عليه خططك ووضعك المالي.

وهو صندوق الطوارئ🧰

صندوق الطوارئ شيء مره مهم في حياتك المالية، لأنه يساعدك تكون مستعد لأي ظرف فجائي، مثل فقدان الوظيفة أو مصاريف طبية غير متوقعة أو حتى تصليحات كبيرة ضرورية. الفكرة تبدأ بأنك تحدد هدف واضح، مثلاً تغطي مصاريفك الأساسية لثلاثة إلى ستة شهور، أو إذا تبي تبدأ بمبلغ صغير، خل هدفك 1000 ريال كبداية، إلى أن توصل لاحتياطي الـ6 شهور واللي هو المدة المتفق عليها من معظم الخبراء الماليين لصندوق الطوارئ.

وأفضل طريقة تبدأ فيها هي تفتح حساب خاص بالطوارئ، علشان تفصل فلوس الطوارئ عن مصاريفك اليومية وما تكون مغرية لأن تصرف منها. بعدها، كل شهر خصص جزء بسيط من دخلك، حتى لو كان مبلغ صغير مثل 200 ريال، ومع الوقت بيكبر الصندوق. وإذا جاك دخل إضافي مثل علاوة أو مكافأة حاول تضيفه لصندوق الطوارئ بدل ما تصرفه.

إذا حسيت إن دخلك ما يسمح تدخر كثير، فكر تقلل من المصاريف اللي ما تحتاجها فعلاً، زي الأكل برى البيت أو التسوق اللي ماله داعي. أهم شي تخلي موضوع الاستقطاع لصندوق الطوارئ عادة شهرية، وتلتزم فيه لين توصل لهدفك.

طبعًا أهمية الصندوق كبيرة، لأنه يحميك من أنك تضطر للديون لو صار أي شي فجأة، ويعطيك راحة بال واستقلالية مالية. وفوق كذا، يخليك مستعد لأي فرصة جديدة تجي قدامك بدون ما تضطر توقف حياتك بسبب نقص الدراهم.

دخّل الاستثمار كسلوك حياتي 📈

أنك تفتح محفظة استثمارية بهدف طويل المدى خطوة ذكية إذا كنت تفكر بخطط مالية مستدامة للسنة الجاية. أهميتها تكمن في إنها تساعدك تبني ثروة على المدى البعيد بطريقة منظمة وبجهد أقل. خصوصًا إذا كنت تدور على استثمار دراهمك بدل ما تخليها راكدة وتتأكل من التضخم. مع الوقت، استثمارك راح ينمو ويحقق لك العوائد اللي تناسبك. لكن الأهم إنك تكون صبور وراعي طويلة وتفكر على المدى البعيد. 

أما كيف تبدأ فسهلة وما تحتاج تعقيد. من دراهم، في أقل من دقيقة بيقترح لك التطبيق المحفظة المناسبة لك، تقدر تشوف الأصول والصناديق اللي بتستثمر فيها المحفظة، والعوائد المتوقعة. حاول تبدأ ولو بمبلغ بسيط، 500 أو 1000 ريال شهريًا، ومع الوقت زوّد المبلغ حسب إمكانياتك. والأهم إنك ما تستخدم هالدراهم لأي ظرف طارئ، ولا تربطها بصندوق الطوارئ، خلها خالصة وخاصة للاستثمار فقط.

وأخيرًا، لا تخاف من التقلبات البسيطة في السوق لأنها جزء طبيعي من الاستثمار الطويل المدى.

اعرف وين كانت تروح دراهمك 💸

معرفة تقرير مصروفاتك للسنة الماضية شيء أساس إذا كنت تبي تخطط للسنة الجاية بشكل أفضل. لأنه يعطيك صورة واضحة عن كيف صرفت دراهمك، ووين راحت، وهل كانت المصاريف كلها ضرورية أو فيها أشياء ممكن تستغني عنها.

فمن خلال صفحة التقارير في دراهم، تقدر تشيّك على تقرير مصروفاتك بالتفصيل للسنة الماضية، من تصانيف ومتاجر، وغيرها. فلما تراجع تقرير مصروفاتك، بتكتشف العادات اللي ممكن تكون قاعدة تستنزف دراهمك بدون ما تحس، مثل تطبيقات التوصيل، أو الاشتراكات اللي ما تستخدمها، أو حتى التسوق العشوائي. هالشيء يساعدك تحدد أولوياتك وتصير أكثر وعيًا بمصاريفك للسنة الجاية.

التقرير  بعد يعطيك فكرة عن المصاريف الثابتة مثل الإيجار والفواتير، والمصاريف المتغيرة مثل السفر أو الهدايا. لما تعرف هالتفاصيل، بتقدر تخصص ميزانية دقيقة للسنة الجاية وتخطط بشكل منطقي يناسب دخلك.

غير كذا، التقرير يساعدك تحدد المبالغ اللي ممكن تدخرها أو تستثمرها. إذا شفت إن فيه جزء من فلوسك يضيع على أشياء مو مهمة، تقدر تعيد توجيهها لشيء يفيدك على المدى الطويل، مثل صندوق الطوارئ أو المحفظة الاستثمارية.

بالتالي، معرفة وين راحت دراهمك هي خطوة مهمة علشان تبدأ السنة الجديدة بخطة مالية واقعية وقابلة للتطبيق، وتتفادى تكرار الأخطاء اللي صارت قبل. 

إذا ربي أحيانا، علمنا وش صار مع خطتك المالية السنة الجاية اللي بإذن الله إنها هالمرة بتنجو.😄