محفظة رمضان الاستثمارية
رمضان قرّب، والله يبلغنا إياه لا فاقدين ولا مفقودين.
شهر رمضان المبارك كذلك مرتبط بمصاريف استثنائية وخاصة فيه، وتصدمنا في كل سنة مهما حاولنا نتجهز لها.لكن هالرمضان بإذن الله، بمحفظة رمضان الاستثمارية بتكون أوضاعك المالية في السليم.
في البداية كلمة السر لأي خطة ناجحة هو، التخطيط المبكّر والحسبة الدقيقة،
اللي يخلي من شهر رمضان المبارك تحدي مالي لدى الكثير هو أن التزاماته تمتد من قبل لا يبدأ بإسبوعين (المقاضي والتجهيزات) وبعد ما ينتهي بإسبوع (تكاليف عيد الفطر). فلازم تبدأ بوضع ميزانية محسوبة تشوف أنها تشمل كل تكاليف رمضان، من مقاضي وتموين، إلى العزايم والفطور الخارجي، وكذلك الصدقات اللي بتخرجها والتجهيزات لعيد الفطر. حط مبلغ تعتقد أنه ما بتخرج الميزانية عن إطاره.
لكن في الإطار العام هذا، فيه نصايح خفيفة تفصيلية بتساعدك توصل للغاية نفسها وهي كالتالي:
- أولًا: إذا جيت بتقضي مقاضي رمضان حاول تقسّم المقاضي على 4 أو 3 دفعات ولا تقنع نفسك بأنك بتقضّي مقاضي الشهر كله مرة وحدة، لسبب وهو أنك مهما حاولت تخليها مرة وحدة بتضطر تقضّي بعد الأسبوع الأول لوصفات جديدة أو أشياء استهلاكية واللي غالبًا بيصير أنك بتفوّت مقاضي ما حسبت حسابها، فالأجدر هنا أنك تقسّم المقاضي على كل جمعة من رمضان مثلًا واللي من خلالها بتضمن مقاضي معقولة ومحسوبة وملبيّة لضروف واحتياجات كل فترة من الشهر وأخيرًا والأهم ما بتضرب السيولة عندك على دفعة وحدة.
*نصيحة جانبية لوقت التقضّي، لا تتقضى وأنت صايم لأنك غالبًا بتشتري أكثر مما تحتاج وفق دراسات علمية!
- ثانيًا: نظّم أوقات الفطور الخارجي من الحين قد ما تقدر، مرّة كل أسبوع ولا مرتين في رمضان كله، أو حتى كل يوم. الفكرة أنك لا تخلي الفطور الخارجي شيء عفوي بحكم أنه يعتبر في قائمة أعلى مصاريف رمضان بعد تجهيزات العيد، وتجهيزات العيد هي كذلك مهم أنك من الآن تحدد متى تبدأ فيها، الأسبوع الأول من رمضان قبل الزحمة؟ ولا الأسبوع الثالث قبل العشر الأواخر؟ المهم تحدد من الآن بشكل مبدئي ميزانية ووقت بداية التجهيزات لعيد الفطر.
*ولا تنسى تستغل العروض والخصومات اللي تكون في رمضان لأنها ممكن توفّر 20٪ إلى 30٪ من الميزانية.
ثالثًا: لو تجمع هالميزانية وتبدأ بفتح محفظة ادخارية وتسميها "محفظة رمضان" وتقسمّ الميزانية على الفترة المتبقية على بداية رمضان، بحيث تودع شهريًا في المحفظة الادخارية وقبل رمضان بأسبوعين أو ثلاث تسحب المبلغ وتبدأ تقسيمها وفق الميزانية والخطة اللي عندك. أو عندك خيار ثاني أنك تنشئ ميزانية داخل دراهم باسم "ميزانية رمضان" وتضيف المبلغ المتوقع وترتب التزاماتك بناءً عليه.
وأخيرًا،
شهر رمضان يعلمنا ويصقل فينا صفات كثيرة تضبط على مدار السنة، الصبر، ومساعدة الآخرين، والتركيز، والابتعاد عن الملهيات، وغيرها الكثير والكثير. فليش ما نضيف عادة الضبط المالية والاستثمارية لهالرمضان بحكم أنها من الصفات الحميدة اللي تقوّم المؤمن وتعينه على أمور دينه ودنياه، والله يجعلنا من صوّامه وقوّامه.
