📈السوق نازل؟

في أوقات كثيرة نسمع إن السوق نازل، وبعضنا يمكن تجيه نوبات الهلع أو الإحباط. لكن، هل نزول السوق اليوم يعني إنك تخسر؟ إذا أنت تستثمر على المدى الطويل، ما تهمك التقلبات المؤقتة. التاريخ دايم يعلّمنا إن أي نزول للسوق يتبعه صعود جديد مع الوقت، والمستثمر اللي يملك "النفس الطويل" هو اللي يجني الأرباح بالنهاية.

علشان كذا فيه دراسة أجريت تبيّن أن 98٪ من الأفراد يخسرون دراهمهم في الاستثمار. ليه معظم الأفراد يخسرون فلوس في استثماراتهم في سوق الأسهم؟

(إِنَّكَ لَن تَسْتَطِيعَ مَعِيَ صَبْرًا)

الإجابة باقتبسها من الخضر عليه السلام في قوله تعالى من سورة الكهف (قَالَ إِنَّكَ لَن تَسْتَطِيعَ مَعِيَ صَبْرًا) وهذا هو لسان حال سوق الأسهم مع المستثمرين الأفراد.

سوق الأسهم معتمد على عوامل عديدة جدًا، سياسية، اجتماعية، نفسية.

إلمامك ومتابعتك اليومية بكل هالأمور وارتباطها في ذهنك بأموالك واستثماراتك أمر يتيح للتردد والتناقضات ما الله به عليم. - الفيدرالي الأمريكي بيخفض النسب الربع الجاي فبيع أسهمك بسرعة، لكن الحرب الروسية الإوكرانية في تصعيد غير مسبوق فاشتر زيادة- وهالتحاليل ما توقف ولا تنفد وإنما تستحدث من العدم، والمربك أكثر أنك فعلًا بتشاهد السوق يتذبذب نتيجة لسلوك الأفراد وتوقعاتهم حول أي تحليل، فبيكون في أحيان كثيرة منطقي جدًا لك أنك تبيع الآن، أو منطقي جدًا أنك تزيد تشتري، وبتكون رهن لمشاعرك اتجاه ارتفاع السوق أو انخفاضه، -والنفس خيل إبليس لا تعطيه نفسك واللجام- زي ما يقول الشاعر.

طيب وش الحل؟🤔

قبل أقترح لك الحل، ودي أعطيك قصة قصيرة.

في 1 يناير 2008 تحدّى المستثمر الأمريكي الشهير وارن بوفيت إحدى الشركات الاستثمارية في إنهم يحطون 1 مليون دولار ويشوفون من بيطلع نتائج أفضل على مدار الـ10 سنين. طبعًا الشركة مليئة بالخبراء والمحللين و استثمروا المليون دولار وفق خططهم وتوقعاتهم وتحاليلهم، بينما وارن بوفيت استثمر المليون دولار في صناديق ومؤشرات استثمارية بس. بعد عشر سنين استثمار المليون دولار للشركة المليئة بالخبراء والمحللين زادت بنسبة 34٪، بينما مليون وارن بوفيت زادت بنسبة 185٪

الفكرة باختصار أن في الاستثمار البقاء للأصمل،

إذا كنت مستثمر على المدى الطويل، والأهداف بعيدة عندك (5 سنين، 10 سنين، أو أكثر)، نزولات السوق الحالية مفترض ما تحد صملتك. لأن الاستثمار ما يعتمد على حركة السوق اليومية، بل على ثباتك وصمودك. كل الدواعي اللي تضغط السوق حاليًا يمكن تروح وتجي، لكن إذا حافظت على استثمارك ونمّيته باستمرار، الرابح دايمًا هو اللي يصبر للنهاية.

ولذا الحل والنصيحة هي أنك تستثمر في الصناديق والمؤشرات وتصمل في إيداعاتك ولا يهمك تقلبات السوق الحالية وبتكون نتائج استثماراتك طويلة المدى أربح وأريح من أي خيار ثاني.