لحقت على الذهب؟ ⚱️
أهلًا 👋🏼،
الذهب يطير! والفضة تطير معاه!
الذهب تجاوز 5000 دولار، وكل ما يرتفع سعره، كل ما تزيد الحماسة، وكل شوي تزيد وتكثر النصايح: "اشتر ذهب الحين! بيوصل مدري كم في 2027"، "الفضة بتضاعف مدري كم ضعف!" وإلى آخره
في هالنشرة بنجيب الموضوع من زاوية جديدة
هل لاحظت النمط؟
الناس تعيد الأحداث بين فترة وفترة.
كل فترة، يطلع لنا "الأصل السحري" اللي بيخلينا أثرياء بسرعة البرق، ويا حسرة اللي ما يلحق عليه.
بعضها وهم زي الزئبق الأحمر.
وبعضها فرصة متذبذبة أكثر من الأصول الطبيعية زي العملات المشفرة.
بس لا تفهمني غلط، في ناس ربحت منها، لكن الأكثرية؟ خسرت.
الذهب والفضة، مختلفين
الذهب والفضة أصول حقيقية، فعلًا
لكن، هل هم استثمار ذكي في كل الأوقات؟
الذهب ارتفع بشكل جنوني في 2025، ووصل لأرقام قياسية، والتوقعات تقول إنه ممكن يوصل 5,000 دولار أو حتى 7,000 دولار في السنوات الجاية.
لكن السؤال: وش بيصير لو انخفض؟
الذهب تاريخيًا متقلب نتيجة الأحداث الجيوسياسية اللي تصير، يرتفع بقوة، وينخفض بقوة.
لو اشتريت في القمة، وانخفض السعر، بتنتظر سنوات طويلة عشان ترجع لنقطة التعادل، فما بالك بالربح؟
وكذلك، الذهب ما يدر دخل.
ما فيه أرباح سنوية، ما فيه توزيعات، ما فيه نمو مركب.
تشتريه، وتنتظر يرتفع سعره، وبس.
فالحل المتوازن
استثمر في كل شيء بتوازن، الصناديق الاستثمارية المتنوعة، تنمو مع الوقت بشكل ثابت ومستدام وأصولها متنوعة.
مو بس تنتظر السعر يرتفع، لا، الاستثمار يشتغل لك، يدر عوائد، يتضاعف بفعل العائد المركب.
لما تستثمر في صندوق متنوع، أنت ما تحط كل البيض في سلة وحدة. أنت موزع استثمارك على أسهم، سندات، قطاعات مختلفة، أسواق عالمية. لو قطاع نزل، قطاع ثاني يرتفع، ويوازن الوضع.
هذا هو الاستثمار الحقيقي المريح.
مو إنك تعتمد بمدخراتك كاملة على سعر معدن يعتمد على قرارات سياسية مفاجأة. أو غيره من الأصول المتذبذبة بشكل غير طبيعي.
الخلاصة
خلونا نلاحظ النمط المعتاد، أصل يظهر فجأة، الكل يتكلم عنه. كثير يسحبون مدخراتهم أو استثماراتهم طويلة المدى علشان يحطونها في هالأصل، ثم يرجع الأصل الطائر لوضعه الطبيعي. ويكون معظم اللي دخلوا بعد انتشاره خسرانين.
لكن في الاستثمار، البقاء للأصمل، الصامل اللي كل هالمتغيرات ما تغيره عن خطته طويلة المدى اللي ماشي عليها. وعن استقطاعه المعتاد عليه. والصامل هو الرابح بإذن الله.
