البيتكوين بين انحياز الناجين والإدراك المتأخر
*ننوه بأن سوق العملات الرقمية غير مشرّع بالمملكة العربية السعودية ولا ننصح به.
في عالم الاستثمار، البيتكوين صار حديث الجميع، خصوصًا بين الشباب والمستثمرين الجدد. لكن، ورى كل قصة نجاح كبيرة في البيتكوين، فيه جانب ثاني ما كثير يتكلمون عنه: انحياز الناجين والإدراك المتأخر. في هالنشرة، بنوضح هالمفاهيم هوكيف تأثر على نظرتنا للبيتكوين والعملات الرقمية عمومًا
فرصة ولا فخ؟
البيتكوين، أول عملة رقمية لامركزية، جلبت ثروة للكثيرين وساهمت في تغيير مفهومنا للدراهم والاستثمار. قصص الناس اللي ضاعفت استثماراتها من 100 دولار إلى ملايين، تخلي الكل يبغى يدخل هالسوق. لكن، وش اللي كثير ما يتكلم عنه؟ المخاطر والتقلبات والنكسات اللي ترافق البيتكوين.
انحياز الناجين: ايش نقصد؟
انحياز الناجين يعني إننا نركز على قصص النجاح وننسى قصص الفشل. في عالم البيتكوين والعملات الرقمية، كثير قصص الناس اللي ضاعفت استثماراتها بشكل خرافي، وهذا يخلي الكثير يعتقدون إن الاستثمار فيها مضمون وسهل. لكن الحقيقة إن فيه ناس أكثر وأكثر خسروا دراهمهم جميعها بسبب كثرة تذبذب هالسوق، وبالعادة اللي يخسرون يكونون صيتهم أقل لأسباب عدة، بين أنه يخجل بأن شكله بيطلع غبي فيتجنب التصريح بالخسارة، أو أن خبر خسارته ماهو مغري كفاية لأنه يتداول بين الناس عكس خبر اللي ضاعف استثماره 200 مرة.
وانحياز الناجين هي مغالطة تنطبق على أمثلة عديدة في حياتنا، ونشوفه بشكل يومي. مثل "عظماء بلا مدارس" وشف ستيف جوبز وبيل جيتس ما دخلوا الجامعة وصاروا نوابغة عصرهم، لكن كم عدد الأشخاص اللي ما دخلوا جامعة وتدهورت حياتهم؟ هذا بالضبط انحياز الناجين بحيث أن الناس انحازوا للي نجوا فقط وتجاهلوا كم الناس اللي خسروا.
الإدراك المتأخر: كنت عارف؟
الإدراك المتأخر هو لما بعد ما يصير شيء، نعتقد إنه كان واضح لنا من البداية. مثلاً، بعد ما البيتكوين ارتفع سعره بشكل كبير، كثير يقولون "كنت أعرف إنه بيصير كذا"، لكن في الواقع، كان صعب التنبؤ بهذا الارتفاع الكبير في البداية.
فالإدراك المتأخر يوهمك بأنه وبعد فوات الأوان كان يمديك تحقق هالشيء أو تسويه، وينسيك الجوانب اللي كنت حاطها بالاعتبار وكانت فعلًا منطقية ووارد حدوثها، لكن لما تحقق واحد من الاحتمالات وضبط، قلت والله أني كنت عارف.
طيب ليش هالمفاهيم مهمة للمستثمرين؟
فهم انحياز الناجين والإدراك المتأخر يساعدنا نتخذ قرارات استثمارية أذكى ونتجنب الوقوع في فخاخ التفكير المغلوط. بدل ما نعتمد على قصص النجاح فقط، لازم ندرس السوق بشكل شامل ونفهم المخاطر والفرص بشكل متوازن.
إذا كنت تدور على أربح وأريح طريقة للاستثمار عندك دراهم 😎
